+994512060920
İnnovasiya və Rəqəmsal İnkişaf Agentliyinin (İRİA) təşəbbüsü ilə Azərbaycanın aparıcı texnologiya şirkətləri və startapları ilə "Ecosystem Meetup" görüşü keçirilib. "Baku ID" çərçivəsində baş tutan görüşdə 20-yə yaxın şirkətin nümayəndəsi iştirak edib.
Rəqəmsal İnkişaf Sahəsində Prioritetlər
Rəqəmsal İnkişaf və Nəqliyyat Nazirinin müavini Rəşad Həsənov Azərbaycanda rəqəmsal inkişaf sahəsində həyata keçirilən genişmiqyaslı islahatlar, "Azərbaycan Respublikasında rəqəmsal inkişafın sürətləndirilməsinə dair 2026-2028-ci illər üçün Fəaliyyət Planı"ndan irəli gələn prioritetlər, həmçinin innovasiya sahəsindəki qanunvericilik təşəbbüsləri, o cümlədən "OpenWave" Açıq İnnovasiya Proqramı və dövlət qurumları əməkdaşlarının rəqəmsal savadlılığını artırmağı hədəfləyən Rəqəmsal Üfüqlər layihəsi barədə ətraflı məlumat verib.
İT Bazarında Tələb və Təklif Arasında Uyğunsuzluq
Azərbaycanda İT sektorunda insan kapitalının inkişafı məsələsinə toxunan Rəşad Həsənov əmək bazarında müəyyən çətinliklərin mövcud olduğunu qeyd edib: "İT əmək bazarında tələb və təklif arasında ciddi bir boşluq var. İT ixtisası üzrə məzunların sayı kifayət qədər olsa da, məzunlar öz ixtisaslarına uyğun iş tapmaqda çətinlik çəkirlər. Eyni zamanda, İT şirkətləri sahədə müvafiq təcrübəyə malik orta və yüksək səviyyəli mütəxəssis tapmaqda çətinlik çəkir. Başqa sözlə, bazarda tələb və təklif arasında balanssızlıq mövcuddur."
O həmçinin bildirib ki, bu problemin həlli üçün beynəlxalq təcrübə araşdırılıb və müvafiq islahatlar çərçivəsində İT mütəxəssislərinin hazırlanması, yenidən ixtisaslaşdırılması və əmək bazarına girişinin asanlaşdırılması üçün mexanizmlər nəzərdə tutulur.
Rəqəmsal Üfüqlər Proqramı Oktyabrda Start Götürür
Nazir müavini "Rəqəmsal Üfüqlər" Milli Rəqəmsal Savadlılıq Təlim Proqramı haqqında da məlumat verib. Proqram çərçivəsində dövlət qurumlarının 30 000 əməkdaşı üçün yeni tədris platforması hazırlanıb. Platformada süni intellekt və kibertəhlükəsizlik kimi sahələri əhatə edən tədris materialları, həmçinin imtahan modulları yer alır. Proqramın oktyabr ayında start götürməsi planlaşdırılır.
Proqramın məqsədi rəqəmsal bacarıqların sistemli şəkildə inkişaf etdirilməsi, dövlət idarəçiliyində rəqəmsal transformasiyanın sürətləndirilməsi və əməkdaşların müasir texnologiyalardan səmərəli və təhlükəsiz istifadə bacarıqlarının gücləndirilməsidir.
OpenWave: Startaplarla Dövlət Qurumları Arasında Körpü
Tədbirdə çıxış edən İRİA-nın İdarə Heyətinin sədri Fərid Osmanov Agentlik tərəfindən hazırlanan "OpenWave" Açıq İnnovasiya Proqramını ekosistem nümayəndələrinin diqqətinə çatdırıb. O qeyd edib ki, proqram qurumların süni intellekt texnologiyalarından istifadə edərək real əməliyyat çağırışlarını həll etməsi üçün imkanlar yaradır: "Proqram qurumların üzləşdiyi real çağırışlarla startap həlləri arasında körpü rolunu oynayır. Qurumlar tərəfindən müəyyən edilmiş problemlərin həlli üçün workshop-lar keçirilir, bu zaman startap həlləri təqdim olunur. Seçilmiş həllər prototip mərhələsində real iş mühitində sınaqdan keçirilir, nəticələr isə müvafiq qurumlar tərəfindən təhlil edilir."
O əlavə edib ki, proqram ilk dəfə bu il sentyabr ayında Plug and Play ilə əməkdaşlıqda "Azərbaycan Dəmir Yolları" QSC və "Bakı Metropoliteni" QSC üçün tətbiq olunub.
Ekosistemlə Müzakirə
Təqdimat hissəsindən sonra iştirakçı şirkətlərlə müzakirə aparılıb. Tədbir iştirakçıları texnoparklar, yerli və beynəlxalq bazarlarda genişlənmə potensialının artırılması, startapların üzləşdiyi çətinliklər və digər mühüm mövzular ətrafında fikir mübadiləsi aparıblar.
Qeyd edək ki, İRİA-nın mütəmadi keçirdiyi "Ecosystem Meetup" tədbirlərinin məqsədi innovasiya ekosistemi daxilində əlaqələri gücləndirmək və təcrübə, bilik, nailiyyətlər və planlar barədə ətraflı müzakirələr aparmaqdır.
